Listos para descarga os 70 experimentos de #ciencianacasa, bo verán!

A mediados do mes de marzo, despois do cese da actividade lectiva presencial, comezamos coa iniciativa “Ciencia na Casa” e chegamos aos 70 experimentos científicos caseiros durante o confinamento. Agora pechamos este peculiar ano académico recopilándoos neste libro que tedes á vosa disposición para descarga premendo na imaxe da portada do mesmo ou nesta ligazón:

70 experimentos científicos para facer na casa

Oxalá no vindeiro curso podamos repetilos todos, e moitos máis pero xuntos e na escola… Sorte, saúde, sentidiño e bo verán!

Advertisement

De volta na web grazas ao coronavirus

Neste ano académico, tiñamos a web e o blog bastante abandonados… A actividade presencial absórbenos moito tempo, porque temos o Club de ciencia dividido en dous: para primaria nos tempos de lecer do comedor e para secundaria pola tarde despois do horario lectivo.

Así o único que fomos actualizando foron os nosos perfís en redes sociais, nos que podedes ver boa parte das actividades que fixemos ao longo do ano. Pero entón chegou a crise sanitaria do Covid-19 e dun día para outro quedamos confinados nas nosas casas, sen poder desenvolver actividades presenciais, nin lectivas nin extraescolares, e como non hai mal que por ben non veña, de aí xorde a iniciativa #CienciaNaCasa coa que cada día de illamento propoñemos un experimento científico para facer, mediante un guión cunha breve explicación de como facelo e algo de teoría e un vídeo e/ou imaxes do desenvolvemento e os resultados.

Trataremos de aproveitar tamén para completar a web cos materiais dos proxectos que non subiramos, agora que imos ter que pasar máis tempo diante do ordenador…

Moito ánimo a todos, lembrade que nunca choveu que non escampara e quedade na casa!

Máis info | Ciencia na casa

Taller de frío na UDC

O venres 24 de maio visitamos a facultade de ciencias onde a profesora María Teresa Rodríguez ensinounos un pouco as aulas e a distribución dos laboratorios.

Despois fomos a facer algunhas prácticas con nitróxeno líquido, xeo seco e outras cousas, os estudantes da ESO tiveron moita diversión e tamén aprenderon.

Entre outras aprendimos como os grandes cociñeiros preparan os seus deliciosos pratos con nitróxeno líquido, as propiedades dos clips deformables que volven á súa forma orixinal ao quentarse e ensináronnos como as grandes fábricas de patacas enchen as bolsas de helio ou argón porque estes eliminan o osíxeno da bolsa e as patacas non se oxidan tan rápido. Máis tarde, e para concluír, fomos ver a xigantesca táboa periódica que se atopa no primeiro andar do edificio e que contén en cada elemento un uso coñecido pola xente, esta é moi entretida e representativa xa que é mais fácil aprender os elementos da táboa periódica con exemplos da vida cotiá que só véndoa nun papel.

O pase de diapositivas require JavaScript.

 

Benvidos ao Club de Ciencia do CPI O Cruce

Este é o primeiro artigo no blog do Club de Ciencia do CPI Plurilingüe O Cruce de Cerceda.

Somos un grupo de profesores, profesoras, alumnas e alumnos do CPI que compartimos o interese por descubrir e comprender o mundo que nos rodea a través da indagación, a preocupación por cuestións medioambientais e as ganas de afondar en temas de ciencia fora dos estándares de aprendizaxe do currículo.

Con moita ilusión, estreamos este Club que aínda non ten nome… Estamos precisamente nestes días valorando diversas opcións e facendo votacións para elixir o nome e o logo que mellor nos definan, o que encabeza este artigo é un dos posibles.

Tamén empezamos a traballar xa nos proxectos que neste ano académico está previsto que sexan catro:

• Ciencia na Crucecociña: orientado a examinar os alimentos preferidos pola mocidade e receitas famosas de distintos países para finalmente deseñar versións máis saudables das mesmas.
• Detectives Climáticos da ESA: proxecto para o que fomos seleccionados e que ten como obxectivo identificar un problema climático, investigalo mediante a observación por satélite e en terra e propoñer medidas para monitorizalo e concienciar sobre el.
• Axencia Espacial Escolar Galega (NOSA): proxecto que facemos en colaboración con outros centros: IES Maruxa Mallo, IES Miraflores, IES Marco do Camballón, IES Arcebispo Xelmírez II e IES Ferrol Vello. Neste curso participaremos no III Congreso NOSA e no lanzamento da cápsula estratosférica MarumaSat IV.
• Miniciencia: é o proxecto a través do cal incorporamos á actividade do club ao alumnado de menor idade do centro con pequenos obradoiros que se imparten nos tempos de lecer.

A través deste blog e dos nosos perfís en redes sociais, poderedes seguir a nosa andaina que xa comeza.

Benvidos!